علامه تكدر خاطرك يا فريد الغيد
علينا وحنا مانوينا ولا ندري
لا تجزع ولا تحزن ولا تكثر التنشيد
تطمن و(هد) بعض المواضيع لا تطري
خذاك الحنين وذبّة الصوت وانت بعيد
وأخذت السرا عن نايد الغصن والقمري
عصافير مجهام السفر تكثر التغريد
ولكن بعض تغريدها ما ملا صدري
لو ان الحناجر بعضها يسحب التنهيد
من الصدر وادفع باقي الفرق. من عمري
ما غير اتحرَّى صبحٍ ابلج بلا تنكيد
نهارٍ تباشيره مع النور من بدري
صباحٍ تباشيره فرح مثل يوم العيد
لو أن العرب هالوقت بالعيد ما تدري
انا ما اتحرّى للوهم من سراب البيد
ولو صار وشلون اقنع النفس في عذري
أنا عن دروبٍ ما تجمّل برجلي قيد
ولا ازعلت نفس ولا رضيت اخسر قدري
- صالح الرشيدي