الوقت يمضي والليالي سريعات
وأعمارنا تطوى سوات الجريدة
العام فات وباقي العام ما فات
كن السنة فيها الدقايق عديدة
أيامنا تجني السنين المريبات
تنقص من ايام العمر ما تزيده
لا تامن الدنيا على الكيف لو جات
ولا تشغلك عنها الحياة الرغيدة
ولابد ما تاخذ من الوقت صكات
وصكات بقعا كل ابوها فريدة
يموت ناس وباقي الموت ما مات
تلقاه ياخذ كل ساعه فقيدة
لو يمهلك عمرك عن الموت بالذات
جاك الكبر دندن وغنا جديده
الشيب عود من صبا الراس يقتات
والشوف غبّش والمفاصل تحيده
ومثل الطفل تصبح وتمسي وهيهات
ما عاد يرجع عمرك إلي تريده
وتضيق منك الناس في كل الاوقات
لو عندوا صكوا عليك الحديدة
وعقب الكبر عندك سنين طويلات
تحت الثرى وحدك بدون العبيده
ما حولك إلا الدود وعظام الاموات
وهم روحوا كلٍ يباري طريده
ومن يرثي الدنيا وفيها علامات
ما سرته دنيا ولا هي بتفيده
يالآدمي تبغى النصيحة من الذات
وتبغى الحياة إلي تسمى سعيدة
جنات ربك عن كثير الملذات
أخير من نارن بجسمك وقيدة
- المها الحارثية