الموضوعات الأكثر
للبطل (الملتحم) تتأهب كل منصات الشعر لمعانقة فوزه المبهر وتنحني له فضاءات السحاب بألوانها الزرقاء. الشاعر مطلق بن فيصل بن صلما وقصيدة لابكتها سوى الكبار وتليق بالملحمة الزرقاء مساء السبت الماضي يهديها للأمير سلطان بن محمد و(الملتحم) وعشاق الأزرق.
دقو طبول الحرب دقو طبوله
حرب المنافس والشرف والعزيمه
والملتحم لامن عرض وقفو له
وعطوه من ذكر الاله القسيمه
وصبو على راسه من العود توله
على الرسن والمعرقه والشكيمه
هذا الحصان اللي يجيب البطوله
ما قلت انا غيره يجيب الهزيمه
رهن طويل الباع رمز الرجوله
اللي عليه من القدايم قديمه
اللي يقوله لازم انه يطوله
وتصغر قدم عينه امورً عظيمه
يالملتحم مالك مع الخيل جوله
سابق طيور الجو وأخذ الغنيمه
يلحق ولا يلحق ويرهق خيوله
ولا احد من الإنتاج قد جاب تيمه
في مركضه يضفي عليهم ذهوله
وفي وقفته يسلب عقولً سليمه
ما كل خيال يجول ويصوله
الا انت يا خيال صلفه وريمه
ياللي مع الحكام تندر فعوله
عليك مجد ابوك ماكف ديمه
وابوك مجد ابوه منهل نهوله
مآثر ماهي لغيرك مقيمه
مبروك ما حققت واللي تنوله
الله يديم الفوز الله يديمه
كأس المليك اللي علينا فضوله
على البلاد وشعبها غيث ديمه
اللي على الإرهاب درهم ذلوله
امصيحه تطوي فجوج الخريمه
والملتحم دايم ميولك ميوله
على النقا ما صار فيها ضليمه
- الشاعر/ مطلق بن فيصل بن صلما