كل ما جيت اعتزل شعر الاحباب اعتزال
هيض ابياته غلاك وبديت كتابته
كن قلبي بوصلة عشق وعيونك شمال
وين ما وجهتها باتجاهك ثابتة
شاعرك يا كنز روحي وصل حدّ الهبال
لين قالوا عنه يا قوّ عين عين صابته
قصدهم عين الحسد والسبب عين الغزال
يوم ودّت نوم عيني وهمي جابته
من يقول اسطورة الحسن تلفيق وخيال
جاهل او ما شاف عجّابته لعّابته
شفتها علمٍ بعد كانت ابعد من محال
واقع وما تنفي الواقع استغرابته
اشهد ان الحب لا لامس قلوب الرجال
لوحداها للظما والحفا ما هابته
تذبل جفوني سهر من صلف طول الليال
في خريف البين واوراق شوقي نابته
- مطلق القعيمة