يزوروني طيفك مع الليل ساري

واشم طيبك والمحك طيف وأحلام

أصيح باسمك واحسبك لي مباري

اسمع صدى صوتك وآخايلك قدَّام

تغرّني دايم طيوف الغداري

افز واعي واكتشف كلّه أوهام

من فرحتي ناديت باسمك اجهاري

فضحت نفسي والمخاليق نيّام

اسهر على شانك ولا انته بداري

أرقد دقيقه وأكثر الليل ما نام

يطري على طاريك مليون طاري

شاعرك من زود التباريح منضام

أفراح عمري مثل شمس العصاري

ياسرع ماتغرب وتأتيك بعسام

صبري قضى من لوعتي وانتظاري

تكفى ترى حالي غدى جلد وعظام

قربك هناي وغيبتك انتحاري

إرجوك لا تبعد ترى بعدك إعدام

شوفك سحايب ترتوي به دياري

وش عاد لو شوفك من العام للعام

شوفك مثل شمسٍ عشقها نهاري

تشرق على كل الكواكب والأجرام

حبك نهر وسط الشرايين جاري

حبك سحر عيّني في غي وهيام

تغرك يميني يوم أشوفك يساري

وآعض لامنّك تثّنيت الإبهام

ياللِّي شعرك الليل فيه المساري

من شاهدك لو يسهر الليل ما يلام

مثلك أبد ما شفت يابوخزاري

ياناقض المرجود يالابس زمام

انته غرامي غايتي واختياري

يشهد على ما أقول حبري والأقلام

مهما تغيب وتبتعد عن مساري

تبقى مواثيق الغلا طول الأيام

- نايف العبيد