قصيدة في رثاء الأمير سعود بن محمد بن عبدالعزيز آل سعود -غفر الله له-
يا والله اللي يا عرب راح رجال
مثله قليل ومثل مثله قليلي
رجال في كل المواقف والاحوال
ثابت على مبدا الوفا ما يميلي
راسه وتفكيره ونظراته امال
وعزم الشجاع الضاري المستطيلي
سعود بن محمد فقيده م الابطال
وركن من اركان الشكاله ثقيلي
يالله عساه بجنة الخلد نزال
ويالله عسى مثواه ظلٍ ظليلي
يالله عسى المنان في يوم الاهوال
يظله بظله وفضله فضيلي
منهج حياته ثابت ما بعد مال
دايم وعينه للوفا والجميلي
ما همه الزخرف ولا همه المال
همه يذب الطايله والطويلي
كل يموت وموت الافذاذ زلزال
والدايم الله ذو الجلال الجليلي
واصلي واسلم عد ما قال قوال
على شفيع الخلق عقب الرحيلي
عبدالرحمن بن محمد بن علي المقباس - الخرج - جامعة الأمير سطام بن عبدالعزيز