احرص على اللي دايم الدّوم نصاح
اللي دروبه كلّبوها صريحه
واحرص على اللي جلسته خير وأرباح
راع العلوم الطيبة والمليحه
واحرص على اللي يسعدك وقت الأتراح
ويعجبك لا ضاقت عليك الفسيحه
طلق الحجاج وللمواجيب نطّاح
شريف.. عمره ما مشى بالفضيحه
حاوي المكارم كاسب كل الأمداح
ريفٍ لربعه والرجال الطريحه
سعد الرفيق وللعدو سمٍ اذحاح
مجنّبٍ كل الصفات القبيحه
هذا الذي يبقى معك درع ووشاح
وإلا الرّدي يا ليت يبنى ضريحه
ودرب المعزة يعرفه ربعٍ صحاح
اللي تروم المرجلة والمديحه
والمرجلة يبغى لها صبر وكْفاح
شدّ الحزام وخلّ نفسك لحيحه
والزم كتاب الله على طول يا صاح
ترى بريق الشر يجذب لميحه
واحفظ حقوق الجار خلّك له سلاح
قاله رسول الله بحكمة فصيحه
والصمت حكمة والصبر خير مفتاح
والعدل ميزان العقول الرجيحه
هذي مثايل صغتها وسط الألواح
نظمتها لأهل القلوب الصحيحه
والختم صلوا عدّ ما بارق لاح
على النبي وإعداد فيض القريحه
- حسن علي الهاجري