في شهيد الواجب الجندي أول محارب اللهيبي الشراري -رحمه الله-
يالله ياللِّي دبرت الخلق بيديه
انت الذي ياربنا نلتجي له
تعلم بما يبديه عبدك ويخفيه
تعلم دقاق أمورنا والجليله
ترحم فقيد المملكة وانت واليه
شهيد واجب حين حزّة رحيله
من دون دينه والوطن ساق غاليه
موته حصل مابين غدرٍ وحيله
العمر يجري مقفياتٍ لياليه
موت الشموح ولا حياةٍ ذليله
في ظل حكّامه بالاعمار نفديه
آل السعود حصون نجد الجميله
نجد العزيزه من تذرّا تذرّيه
ام الجمايل والفعول المهيله
نموت دونه عز والعز راعيه
شهيد عند الله بجنه ظليله
وفيت يا محارب وفعلك فخر فيه
ارض الوطن ومواطنه والقبيله
وجتك المنيّه يامنومس عوانيه
ماجتك والله بالفعول الرذيله
لجل الوطن موت الشهاده نحييه
نطنخ بعز وضدنا ويل ويله
العمر يرخص ما نحسّب بتاليه
ما همنّا لو ظل بالعمر ليله
عبدالله سلامه الصوالحه الشراري - الجوف