لا سقى الله مجلسٍ ما به جزال

خاليٍ من شبّة النار وحطبها

لا بغيت الكيف من صفر الدلال

تنفطر كبدك ولا جاها شببها

البخل شرٍ على بعض الرجال

قاصرٍ بالطيب ونفسه ما كسبها

يا عسى مثله من الدنيا زوال

ما يزيد الخلق عزٍ في نسبها

الردي قد قيل ساسه من خوال

هم دسايسها وبالذمه سببها

ذخر ضعفٍ ورّثوها للعيال

ما تزيد إلاَّ على اللِّي ما حسبها

والنهايه خذ من الحكمة مثال

آخر بيوتي نصيحة من قضبها

لا وردت أطمع ترى ورد الزلال

يسقي عذوقٍ حلاها في رطبها

- ناصر المتعب