الموضوعات الأكثر
كريم يابرقٍ تبين وميضه
من البعد برقه بالوطى كل ماناض
جعله يساقي مملكتنا العريضة
يعمها وديان وهضاب وفياض
يطفي عطش بيدٍ كواها مقيضه
مزنٍ مناصيبه مراديم واعراض
يبرق ويرعد ويتعاقب نفيضه
يازين برقه مع قرى نجد لافاض
من شاف براقه ابّرقه يهيضه
نوٍ سرى برقه يهيّض تهياض
مزنٍ على البيدا سكب جود فيضه
سيله مع الوادي سبوعين ماغاض
وأسبوع وجذوع النوامي غليظة
راس الحزم كنه بساتين ورياض
تشبع به اللي من هزلها مريضة
عقب الهزل قامت تنقّض تنقّاض
لاشافها الحاسد يغار وتغيظه
من غيرته كنه هكاليوم مغتاض
تقهر نفوس اهل النفوس البغيضة
واضحى سناد عظامها طوال وانهاض
على كنف وضحٍ لناسٍ حظيظة
ناسٍ بهالدنيا سعيدين واحظاظ
مريتها ماني على حد ريضة
طرقي مسافر مع وسيعات الاراض
في ديرةٍ فيها القطا فوق بيضه
يحط بيضه بالمحاجر لياباض
أرضٍ خلا من سج فيها تعيضه
ضوضا المدن لو تنقصه بعض الاغراض
الوقت يجري والحياة اتغميضة
والعمر صعب انه يرجع وينعاض
من لا يسج اقدام رجله غميضة
مع جرهدٍ فيها ابرق الريش ربّاض
من فوق شاصٍ كن زول تعريضه
ذيبٍ عقب ماشم ريح الونس جاض
برفقة خويٍ ماتدور عويضه
من خلقته والكل عن سيرته راض
هذا منايه مع لزوم الفريضة
وشوف الربيع وبارق الوسم لاناض
- فواز الفالح