وقتي يجاملني بعذري وطيبي
وانا اتسمّع وش يقولون الأحباب
لحظة أنا اللي بسأله ياحبيبي
كانك تكذبني ترى الصدق كذّاب
قلِّي بربك لامتى تعتنيبي
البرد عمري والفرح فاس حطَّاب
هذي سنه ما قلت لي وش تبيبي؟
واقف بقلبي لاحضر بك ولا غاب
كنّك على باب العتب تدّعيبي
كنّك تعاتبني وانا ما اسمع عتاب
جرّب بكيفك بس لا تبتدي بي
من يضمن الصدفه على درب الاغراب
وقفت أحسب إن الزمن من نصيبي
يا عنك ماني واقفٍ لي على باب
عين الرضا تغضى وانا اشوف عيبي
وعين الغضب عيبي لها مثل الاهداب
والا انت بعضك عاذرك ياحبيبي
نصفك خطايا بس أنا كلِّي اسباب!
- هلال المطيري