هلا يا مرحبا من خاطر المكلوم للمكلوم
رفيقٍ يعجب الفاهم اليا منه قرأ فنّه
رفيقٍ واضحٍ معناه من جنس الدرر منظوم
سمى قلبي لتقديره ونفسي منه ممتنّه
تذكّر ما مضى يوم السلع تشرى من أول سوم
هاك الايام يومه مالحقهن كيف شاقنه
وأنا أفهم مقصده يبي الوفا اللي هالزمن معدوم
كثير البيض لو هن يسمعن به ما يعرفنه
هوى هالوقت يا ناصر يشابه وردة اليشموم
لطيفٍ ريحها بس المراره فيه مكتنّه
وإذا تنشد عن أخباري فلا سرٍ تبي مكتوم
أنا قلبي يتوق ولكن أيامي يضدنه
مثل ما قال راعي السالفه يا لوعة المحروم
يشوف الماء ولكن عنه صدفاتٍ يحدنّه
الاشغال الكثيره واختلاف الظن والمفهوم
من أسباب ابتعادي عن طريق النار للجنه
اجبتك باختصار ولا لنا في طولها ملزوم
حلاة الهرج في معناه وافكارٍ يبارنه
ارى من واجبي والناس يدفعها شرف وسلوم
رفيقٍ ما وصلته لازم أشواقي يزورنه
عبدالله السلوم -رحمه الله-