ألا يامل قلبٍ كل ما جاء الليل جاه إهموم
كما النيشان قلبي للهموم اللِّي يصوعنّه
أهوجس واتنهت والتنهّت عادة المضيوم
واعض شفاي بسنوني غضب واجاذب الونّه
على وقتٍ تنحّى وانقضى ما باقي الا رسوم
زمانٍ فات ياليت الليالي لي يردنّه
زمانٍ ما لحقته بس جاني عنه رد علوم
يبيع ويشتري به راعي السلعه بلا منّه
وانا ابدي المشكله للِّي علومه مع كبار القوم
جزيلات المعاني لا نصنّه ما يفوتنّه
يعرف المخطيه والصايبه زيزوم قرم قروم
ولو ما هوب كفوٍ للمعاني ما تنصنّه
أنا أنشد واتنشّد والاجابه عند ابن سلوم
وانا عندي خبر عسرات الأريا ما يعسرنّه
علام الحر الأشقر بالخضيرا ما يدير الحوم
ولا يرفع جناحه للحبارى لو يمرنّه
وهو في اللي مضى في ظن بالي صيرمٍ ملحوم
أنا ما ادري هزل والا الليالي غيّرن ظنّه
وصلاة الله وتسليمه على اللي من الخطا معصوم
على خير البشر صفوة قريش موضّح السّنه.
- ناصر المسيميري