باول دخول الوسم تستبشر الناس
لا شافوا خيالٍ تكاشف بروقه
كلٍ يقول الخير نوه على الراس
واكبر سعادة لا تهامل حقوقه
يسقي فياضٍ من لظى القيظ يبّاس
ويحيي نباتٍ ضامياتٍ عروقه
ينبت خضارٍ يكسي الأرض بلباس
مد النَّظر من شاف شكله يشوقه
عشبٍ يسر البال ويبعّد الياس
ولا فيه وصفٍ مثل وصفه يفوقه
تعله امطارٍ بلا حد وقياس
ياخذ مطرها عشرة ايام فوقه
يفوع نبت الأرض بانواع واجناس
ويملا العيون اللي لشوفه شفوقة
يصبح ربيعٍ يذكره كل عساس
وكلٍ حلاله للمراعي يسوقه
غالي على اهل الذود واغلى من الماس
يفوق سعر الماس في وسط سوقه
شوفة زماليقه يردّن الانفاس
وينعش رجالٍ بالمراجل سبوقة
ناسٍ لهم فالوقت طيبٍ ونوماس
لا جالهم ضيفٍ تكمّل حقوقه
يلقى له رجالٍ كرمهم على ساس
ما باعوا الضيف المسيّر غبوقه
فعل الكرم والطيب عزٍ ونبراس
عند الرجال أهل النوايا الصدوقة
أحمد بن سعود الحمد - الزلفي