شب السوالف امتلى موقد الصمت
واقدح على رمث الحيا في عيونك
هز الشفايف حتى لو ما تكلمت
وارفع عن احلامي ستاير جفونك
معذور انا لو في عيونك تلعثمت
الشمس ماتقرا المسافات دونك
هدت عيونك في عيوني وتبسمت
هونك علي ابطرد الخوف هونك
ياللي بخيالي وفي حناياي خيمت
سرحت بشفاهك وخدك ولونك
لو ترمش عيوني بشوفك تندّمت
اخاف تخطي يم غيري طعونك
وان غبت عن عيني ثواني تألمت
تاهت ظنوني في صحاري ظنونك
نثرتك بليل الهيام وتلملمت
لين اورقت باحلام عمري غصونك
تعال ابعطيك العهد لو تكرمت
اني ما اخونك لو عيونك تخونك
طحت بعيونك ياجنوني ولا قمت
وشلون ياقف من يطيح بعيونك
- خالد الجبر