الموضوعات الأكثر
يالله تخزي كل شيطان رجيم
وتذلّله وتذلل اتباعه معه
وتحفظ بلادٍ نهجها الدين القويم
وفيها الاذان بكل فرضٍ نسمعه
وفيها حرم مكة وزمزم والحطيم
وفيها قبر نبيّك اللي نتبعه
سليمة المبدأ ومنشاها سليم
والحق يصدح في الجهات الاربعة
فارجاءها ماضاعت حقوق اليتيم
ولا شاف منها مايسيّل مدمعه
وللمسلمين تقدم الخير العميم
وعنهم تحاول كل شرٍ تمنعه
والشرع يقضي للخصيم من الخصيم
والظالم بنصّ الشريعة تردعه
مافرّقت بين المواطن والمقيم
في كل حق وكل خير ومنفعه
بلادنا وبلاد اهلنا من قديم
اللي حموها يوم كانت مقطعة
ياجعل مثواهم لجنات النعيم
نطلبك ياللي كل داعي تسمعه
واملاك اهلنا دونها البحر الطميم
والبحر مايدري عن اللي يبلعه
في حب قايدنا ودولتنا نهيم
والخوف بقلوب الاعادي نزرعه
اقوالنا ماتضرب الا في الصميم
وكف يبي يشر علينا نقطعه
وفي صدورنا علمٍ نقوله للغشيم
اللي شياطينه وراه وتدفعه
ماعندنا للمعتدي غير الجحيم
مير اسمعوا مازال حنا في السعة
قدام نروي سلة السيف الصريم
وسبع الخلا والطير منكم نشبعه
والحكم لله ثم حكم ابرك زعيم
ابو فهد والطيب كله منبعه
اللي ما جابن مثله بطون الحريم
الله معه والشعب بإذن الله معه
- محمد خربوش العتيبي