لا يا علي ما همّني مستواها
ولا نيب من يعشق سراب المشاهير
صحيح يسرح خاطري في حلاها
اللِّي غلب سحرٍ حكته الأساطير
وصحيح أنا طيرٍ مداري سماها
وأصل.. السما في ملمسه يغري الطير
وصحيح أنا شاعر خذاني هواها
ومن طابع الشاعر يحب الغنادير
وصحيح أنا طفلٍ حواني دفاها
والطفل يحفظ للدفا.. كل تقدير
وصحيح أنا دربي يغازل خطاها
ومن لوعة الغربة عشقت المشاوير
كلّه صحيح: إلاَّ أني أركض وراها
لو هي قدر.. وانا رهين المقادير
تدري.. ويمدي «صامل» العلم جاها
إني عنيد مخالفٍ وجهة السير
والله.. فلا أخضع لو ملكني غلاها
وإن طوّعتني: ما بقا بالبشر خير
- سليمان المانع