الموضوعات الأكثر
ظروف الليالي لو تحد الرجل لاقصاه
يموتون حساده ولايشتكي ضيقه
يجيه الفرج لو كان طوّل وهو ماجاه
يجي له من الله ما يجي من مخاليقه
وأنا يوم ضاقت قلت يا خالقي يالله
عزيزٍ شكا لك ضيقةٍ في معاليقه
تولّه بتدبيرك وخفف عليه خطاه
ثقيل الحمل يا خالق الكون ما اطيقه
أشوف الحسود يسنن رماحه وشلفاه
طعون الظهر نصر يتنومس بتحقيقه
ولو تقبل الفرصة على كيفه ومشهاه
رماني برمحٍ ماتداوى مزاريقه
أنا لي مبادي والرجل يمشي بمبداه
مع سلوم جدّانه يجدد مواثيقه
أحشم الرفيق اللي حشمني ولا أنساه
وأورّده للجمّة إلى من نشف ريقه
وإذا زارني كبّرت في مجلسي مركاه
يليق بحضوره وأيضاً المجلس يليقه
ومن لا يخاويني على العز ما أنصاه
خوي الرخا ما ننشده عن تشاريقه
ومن لا يداري خملة الصاحب عن عداه
يبيّن على وجهه بقلّة توافيقه
ترا اللي يدوّر بالخلايق زلل يلقاه
ولكن خويّ العزّ يستر مفاتيقه
واقدّر قريبٍ بالوصل دايمٍ ممشاه
مساعيه لمّ الشمل ماهي بتفريقه
يحبّه بني عمّه على فعله ومسعاه
ولا يدخل بمجلس تحوفه مطافيقه
وأحب الكريم اللي عشق ضيفه محيّاه
إلى جاه يفرح به تقل نازعٍ ضيقه
وهذا يصب السمن الاصلي على يمناه
وأفاخر بشعرٍ خلّده في طواريقه
ترا الطيب ما هو بس ذبحة بعير وشاه
كريم الريا يصعب على الناس تصديقه
يقلّط مفاطيحه لاجل صالحٍ يبغاه
يحسب الكرم تخفى علينا مطاليقه
أقوله وأنا شاعر إذا جاد في معناه
تغنّى به رجالٍ للإبداع ذوّيقه
- متعب النصار