الموضوعات الأكثر
يالله ياللّي تخلق الانس والجان
يالله ياللِّي كلنا نستجيره
نطلبك رضوانٍ وعفوٍ وغفران
ونصراً بتأييدك يعجّل بشيره
ياما صبرنا لكن الصبر ما زان
واليوم دق الحرب طبله وزيره
يالعاصفه لبيه حان الوعد حان
والسيف لازم نظهره من جفيره
لأجل الشريعه والوطن ثم سلمان
خادم بيوت الله صقر الجزيره
ليا زعل تزعل حكومات وأوطان
وليا رضى ترضى معه كل ديره
لبيه يا سلمان من قلب ولسان
شعبك يلبِّي والوجيه السفيره
صاح اليمن يا سيّدي وانت مزبان
يا مزبن اللي وضع داره خطيره
تفزع وتجزع حازماً يا بليهان
تنفع وترفع حق جارٍ وجيره
حنا جنودك فالوغى ياكحيلان
من وين ما وجّهت قود المسيره
والأمر قبل الفجر باشره شامان
حي الأمر حيّه وحيّا وزيره
محمد يا بن سلمان يا طير حوران
الجيش تحت أمرك رجال وذخيره
هد الحرار اللي ترفرف بجنحان
وهد الأسود الضاريات المغيره
وكل الخليج اليعربي درع واخوان
ضد العدا واهل الردى والغريره
والعرب وقت الحرب في صفّنا اعوان
في نصرة أهل الدين نخوه وغيره
عليك يالحوثي نيازك ونيران
ناراً تلظَّى من لهبها سعيره
والا انت يا عفّاش هافي وخوَّان
يا خاين المعروف وأعمى البصيره
نسيت ماضي خيرنا كل الأزمان
وضمّيت نفسك للنفوس الشريره
طمعت في تمر النخل يا عميّان
ونسيت سيفينٍ تحتها شطيره
تتبع هوى نفسك وبايعت لإيران
مالك ومال أهل اليمان القصيره
لكن جاك العلم موجز وعنوان
هبّت هبوب العاصفات المطيره
حزم وعزم والحسم من عالي الشان
تفرك على خشوم الرخوم الكسيره
الحق بان وخاين الجار قد بان
زابن مع الحوثي بداخل جحيره
ان عشت جابانٍ وبتموت جابان
واللي يمس الدين يلقى مصيره
هذا كلام الحق من دون نقصان
لعفاش والحوثي ومنهو شويره
الله خلقنا لنصرة الدين فرسان
ما نقبل الزلّه ولو هي صغيره
واللي طمع بأرض الحرمين غلطان
ندعس على غاربه صبح وظهيره
الجيش تأمن به شعوبٍ وحدان
والدار تحرسها العيون السهيره
وان جيت للتاريخ بعطيك برهان
عهد المثنّى مجدنا والمغيره
وختامها بيت سمعته لراكان
للشيخ بن حثلين حكمه شهيره
ما قل ودل وزبدة الهرج نيشان
والهرج يكفي صامله عن كثيره
- الرائد: عادل بن علي بن عسوج