قلت أسرِّيها على الغيم وتفلّه
صرخةٍ جت من ورا ضلوعي دفينه
جبتها يوم الخواطر مسفهله
في نهارٍ يلبس ثياب السكينه
تطوي الأرض لحفيد الطيب كلِّه
من تسمَّاه الفخر واطلق جبينه
من على الطولات سيف المجد سلّه
والمراجل كلها جت في يمينه
فخرنا محمد ومن ياصل محله
ساكنٍ فينا وحنَّا ساكنينه
طير حوران وسليل الطيب من له
في ميادين الفخر اكبر مدينه
ولد منهو ظلّنا بالخير ظلّه
بو فهد يا جعلها تبطي سنينه
كفو من ربَّاه بالعز وفطن له
لين صار الحر وش كبره بعينه
فيه ظن ابو فهد ما خاب لله
جا على الظن يتهادى من عرينه
ودام هو نبراسه وهو قدوةٍ له
ما عليه خلاف من حينه لحينه
فيصليٍ يعقد الراي ويحلّه
والشجاعه سيفها يزهى يدينه
حرٍ يدل النواميس وتدلّه
مسرج خيول الهقاوي خابرينه
من بحر سلمان خل العلم خلّه
مرتوي من حكمه وحزمه ولينه
وان كتب تاريخ الأمجاد .. بسجلّه
سيرته فاح بشذاه وياسمينه
منهو مثل محمد ومنهو وصل له
وينه اللي يشبهه وينه ووينه
- خالد الجبر