يدوم عزك ياوطن رغم الحسود
في ظل حكامٍ لهم باعٍ طويل
لطامة العايل عريبين الجدود
آل بن فيصل مروية حد الصقيل
درع الجزيرة من الحدود إلى الحدود
بقيادة اللِّي لا يذل ولايعيل
سلمان بن عبدالعزيز ابن سعود
أبو فهد سلمان كساب الجميل
وحنا ترانا ياوطن بامره جنود
نحمي حدودك ما يدنسها العميل
بيعة وفا وإخلاص من ورث الجدود
وحنا نورثها لجيلٍ بعد جيل
حب الوطن من حب حكامه يزود
ربعٍ على اوطان العرب ظلٍ ظليل
من لاذ بحماهم مشى يرقى سنود
بعزمٍ مهيل ما يعرف المستحيل
يدوم دايمهم ولله الخلود
سلة هل العوجاء مزبنة الدخيل.
- الشاعر: إبراهيم بن راشد بن عبدالله بن كويبين