الموضوعات الأكثر
خاص - مدارات:
درج كثير من الشعراء على تبادل القصائد الإخوانية إما حول موضوع أو مداعبة رقيقة، وقد حفظ سجل الشعر الكثير من هذه القصائد التي أثرت وأمتعت.
اليوم نطرح هذه الإخوانيات الجديدة والتي بدأها الشاعر فهد الفايز موجهاً أبياته للشاعر سليمان القاضي.
وقد بادر الشاعر محمد الشبل والشاعر صالح المرزوقي بالمداخلة.
ثم أتى الرد من الشاعر سليمان القاضي بالقصيدة الرابعة رداً على الشاعر فهد الفايز الذي قال:
علامك تطنز ما تقدر مقام الناس
تطنز علي ولا تعرف الرجاجيلي
الا يا حسافة بس يوم ادني المحماس
واقلب من البن اللقمتي محاصيلي
على جال حاير والهوا غادي نسناس
احوفه واراعي حمسة ما بها ميلي
واخليه يبرد لين يصبح عذي انفاس
وادقه بنجر مثل صوت المواويلي
والى اشتاق له يا صاحبي من غشاه نعاس
من الهيل الاخضر نوفي القيس والكيلي
اهلي وارحب والحجاج اطلقه باحساس
واركد بجنب النار صفر المعاميلي
على شان شرب الكيف يجلي كثير عماس
من الكيف اصبه لك ابّيض الفناجيلي
لحيثك من الغالين يا شمعة الجلاس
اخدمك واسولف لك بزين التماثيلي
جزانا عقب هذا نعود على الافلاس
تطنز بنا واخوك ما عاد به حيلي
ثم قال الشاعر محمد الشبل:
خذيت (الكبتشينو) وهو طافح بالكاس
وجابوا معه سكر وبِيض المناديلي
وغنيت موالي علي طقة المرواس
قصيد الهواوي آه ياعين يا ليلي
وحلّقت بافكار جناحينها الهوجاس
وسهران فرحان وقاعد علي حيلي
وافكر بربعي دامني ما قطعت الياس
تمنيت ياحظي بسرعة تلبي لي
يجيني ابن فايز وادندن له الاجراس
معه خالي القاضي نديم التعاليلي
ونجم المجالس دايم يبعث النوماس
رفيقي سليمان وخياله يباريلي
ندير السوالف ما على هرجنا حراس
ولا نرجي الا ربنا بالتساهيلي
ودامي دخلت السالفة قل لي لا باس
ولادري وش اللي بينكم غير تحليلي
وانالي معك يابو رضا همسة الهماس
تذوق الكبتشينو وان اعجبك تدعي لي
وتلاه الشاعر صالح المرزوقي قائلاً:
قريت العلوم اللي لفت من وكالة واس
على شاشة الجوال فيها التفاصيلي
تفاصيل تطرب هاجس يبترم بالراس
على كبدي احلى من قراح الشهاليلي
بداها زعيم اهل القوافي قوي الباس
معانيه تطرب مثل شدو البلابيلي
يصوغ المعاني مثل صوغ الذهب والماس
اغني على قافه وازجّ الهلاهيلي
ورثها من اللي في بحورالشعر غطاس
غني عن التعريف بالقيل حلحيلي
وجاوبه منهو بالمعاني قوي احساس
على الكود كد جارى هل الجيش والخيلي
الى ماحمس له حمسة وقلبه باقياس
تجي دلته به خنة البن والهيلي
افتش ولا حصلت بالقاف كود لحاس
ابو شبل مص الشطر واخلى الدحاليلي
ثم جاء الشاعر سليمان القاضي (أبو تميم) وقال:
هلا بك وقدرك يا فهد فوق ماينقاس
عزيز حشيم مايبي زود تدليلي
مقامك رفيع يا فهد فوق هام الراس
اقوله وابرهن لك ولا هوب تمثيلي
انا خابرك تمزح وتقبل مزوح الناس
وش اللي تغير بك عتاب وتهاويلي
علامك جزوع وصابك الهم والهوجاس
تقلب كلامي بين ظن وتحليلي
ترى ماحصل سبة وانا ماجرحت احساس
توقع وهود لا تزود لها الكيلي
ترفق وشوري لك تعوذ من الخناس
وغرد بحسن الظن من دون تعليلي
انا ما بديت الهرجة اللي غوت بالراس
ولا جبت له طاري ولا هيب تطري لي
الا يا وسيع الصدر وش غيرك لا بأس
عسى اللي جرى لك مايجي لي ويجري لي
عقب ذا السنين ورفقتك ما فرقت الناس
تقول اتطنز ماعرفت الرجاجيلي
اجل ما افرق الطيّب ولا اميز الانجاس
واساوي رفيع القدر بالواطي الحيلي
مزحنا ولكن مانبي للحبال امراس
ولا هرجة ضايع بها القال والقيلي
وانا بنشدك يالشبل وش هو دواء العوماس
ورى ماتوصف لي علاجك وتفتي لي
تبي هالكبتشينو جلت ما علق بالراس
لعلك تبين سرها لي وتبدي لي