ابديت ما اخفيت واخترت المصيب من الهناديب
ابيات يفهم لها من كان له عقلٍ لبيبي
قالوا لي الناس شبت وقلت ما يزملني الشيب
من عاش ما مات لا بده من الدنيا يشيبي
الشيب ما فيه لابن ادم مناقيد وعذاريب
غذاه فضل الشباب وراح مرجاعه صعيبي
تسير الأقدار بالمخلوق تشريقٍ وتغريب
برق بزين القمر والي انتهى وقته يغبي
يا طّيب العقل ما تكمل بدنياك المطاليب
لو طاب لك حاجتين فثالثتهن ما تطيبي
كلٍ على قدر حاله موجسٍ منها تجاريب
شيٍ يعالج وشيٍ ما يفيد ابه الطبيبي
والرزق مضمون عند الخالق اللي يعلم الغيب
يرزق ضعيف العزوم ويرزق الشهم النجيبي
كثر الحَرَص مارزق فرخ الغراب ولا اشبع الذيب
كم ليلةٍ بايتٍ جيعان باطراف العزيبي
- عبدالله اللويحان