هذه مرثية في الشيخ بدر بن صفوف الهذّال رحمه الله، وأسكنه الفردوس الأعلى من الجنة، وألهم أهله وذويه الصبر والسلوان. ونتقدم بأحر التعازي وصادق المواساة إلى الشيخ الأطرق بن بدر الهذّال وإخوته وأسرة الهذال كافة في مصابهم {إِنَّا لِلّهِ وَإِنَّا إِلَيْهِ رَاجِعونَ} .

مرحوم يا شيخ المشايخ نعيناه

شيخ (ن) تعدّى بالمعالي الصدارة

لا قلت ابن هذال تكفيه يمناه

لا من عطى كنّه كسب له تجارة

ينومس الويلان باسم (ن) كسبناه

من ماضي الأزمان لين الحضارة

لا من نخيته نوّخ الصعْب وافناه

وارسى عواميد الفخر في قراره

وشلون يا قبر الكرم لا قبرناه

أخاف ما نلقى الكرم عقْب داره

يالشيخ الأطرق ما خسرتم خسرناه

دنيا بها ربحك وتالي خسارة

مرّة تسرّك والشقا حول معناه

تعطيك من حلو الليالي مرارة

يومن لها مع طلعة الصبح مغناه

ويومن لها من غيبة الشمس غارة

واللي فقدنا من عزيز (ن) وجدناه

بعياله اللي في حلاياه شارة

من نسل أحرار العرب لا طلبناه

شيخ الشيوخ اللي فقدنا نهاره

يالأطرق الهذّال شيخك دفنّاه

بين الضلوع العوج والقلب جاره

ذكرت ابويه يوم قالوا فقدناه

عساه في الفردوس عالي المنارة

بدر بدر ما له شبيه (ن) وصفناه

لكنّها أزرت في وصوفه اشعَاره

مرحوم يا حرّ (ن) عزيز (ن) رثناه

تبقى عزيز (ن) في شموخ الإمارة

لكنّها سنّة ودرب (ن) مشيناه

والموت ما عنّه هروب وسفارة

كل (ن) يبي يلقى مصيره ومجناه

وكل (ن) يبي يدفن بحدر الزبارة

في لحْد ضيّق ما يونّس سكنّاه

والناس راحوا وابغضوا هالزيارة

كل (ن) يبي ينسى وذِكرك نسيناه

كود العمل لا صار طيّب عمارة

خلّك فطن واعمرْ على زِين مبناه

واعزّتي للي عماره دماره

يالله ترحم من تركنا وتركناه

ما له ونيس (ن) كود ربّ الحيارة

اللي خلقنا من عدم هو طلبناه

ما غيره احْد (ن) كلّنا له فقارة

ترزق ابن هذّال في طيب سكناه

جنّة من الفردوس زاهي خضاره

- شعر: إبراهيم نهار العنزي