بعد فوز الهلال على لخويا القطري، قلت هذه الأبيات وفيها عتاب على الحكم فألف مبروك للموج والعقبى لكأس آسيا:

البطولة قريبة وسعدنا بالبطولة

لكن الظلم واضح للزعيم الهلالي

يلعب اليوم باتقان ولابه أحد(ن) يطوله

وقلت من هو حكمها وما مشى بالعدالي

ما أقوله لحالي لكن كلـ(ن) يقوله

كم سكتنا وقلنا ولا به أحد(ن) يسالي

لكن آسيا تفرج وضدنا في حصوله

كل ما أقبل علينا قالوا يا هملالي

كم نفوس(ن) تمنى وضدنا في وصوله

والبطل ما يهمه قول قيل (ن) وقالي

والحكم لا عدل يا ما تجي بالسهولة

كم بطولة فقدنا وقربها للمنالي

لكن الكاس قادم بإذن ربي حلوله

والبطل ما يفكر في حسود(ن) يلالي

يا بطل لا تطاوع ولا تناظر جهوله

كاسنا بإذن ربي في يدين الرجالي

دام أبو سعد حاضر ثم جهز خيوله

الذهب يا بطلنا قلت ما هو محالي

الصفافير خانت قاسية ومهبولة

والسبايب نشوفه في غشيم استرالي

أربع أهداف جبنا وضاع مثله وحوله

كيف نسكت ونرضى وآسيا ما تبالي

يابو فيصل وسعد(ن) مالكم تسكتوله

انهضوا يالنشامى لا يضيع الحلالي

قلت أنا الوقت قرب لا تضيع البطولة

ذي رسالة نقوله لطيبين الخصالي

- الشاعر/ محمد بن عبدالعزيز الخنيفر