هلا بك ياربيعٍ شقّت بروقه حجاب الليل
هلا بك والعيون لشوفتك في دمعها غرقى
هلا باسم الدلال اللي بداخلها يفوح الهيل
باسم جمر الغضى اللي يشتعل لا.. طرّوا الفرقى
باسم غر السحاب اللِّي سرت باسم المطر والسيل
باسم غصنٍ بجوفي غرَّدت لك فوقه الورقى
هلا بك عز.. والي برقك اللِّي يوجب التهليل
هلا وان قلتها لك يبتسم ثغر السما الزرقا
حبيبي لا.. لفيت اسرجت لعيونك ظهور الخيل
ولا هانت عيونٍ تجعلك فوق الهرم ترقا
عيونٍ ساحراتٍ لا.. سهج صفّة هدبها الميل
يذوب أعلى جبل لا.. سلهمت له ويغدي برقا
تعال بكل مابك من جمالٍ يرفض التبديل
تعال وخل طعنة رمح عينك في الجسد تبقى
أحب أقابك واكره وداعك يا حبيبي حيل
إلى صارت يميني ترتعش في كفِّك العرقى
أخاف أقول لك مع السلامة والدموع تسيل
ويذبل في الصدر عود الخزاما والزهر يشقى
وتبقى لو تمادى بك غيابك فوق نجم سهيل
وحيد وكل عين لشوفتك في دمعها غرقى
- الشاعر/ عبدالله عبيان اليامي