يا حي هالصوت يسوى كل الأصوات
قامت تسابق على شانه قوافي
مالوم الأبيات واللِّي قال الأبيات
من يسمع الصوت هذا ما يخافي
نبرات هالصوت ماهي باي نبرات
تأخذك لآخر محطات الفيافي
اجبرني أحكي معه لو كلِّي سكات
ياعنك من يسمعه ما قال كافي
واعادني للقصيد وللمسافات
ومهما حصل لي من أسبابه عوافي
هذا هو اللِّي لا قلت الذات بالذات
ياخذك عن مهزلة كل المنافي
يا قوم يا ضاع لي قبله سنوات
عجاف في كل مفهوم العجافي
حتى حسبت المشاعر ضمن الأموات
وادركت حجم التواصل والتجافي
ولحظة وصل والمواجع راحت اشتات
يا حي هالصوت لين يقول كافي
- الشاعر: دحيم النومسي