يهب الكلام ويكسر الصمت لين نقول..

كلامٍ يهز الروح جمله ورى جمله..

وانا شاعرٍ لا من حكى ينبش المجهول..

الين السما تقراه يا شاعر العمله..

توخى الحذر يا صاحبي وانقض المفتول..

ودور لبيتٍ يطرب اسماعنا وامله..

على ساحةٍ نصفٍ رعاعٍ ونصف خبول..

يحطون ساس الراس في غبة الرمله..

ترى السمع عن ما يدبل كبودنا مشغول..

لو ان القصايد تنزل السوق بالجمله..

نوخّر من المنقول ونطيح في مقيول..

وما عاد فينا من يهيجن على زمله..

أقلك تعال نغيّر العلم قبل يطول..

ورانا زمانٍ يتعب كتوفنا حمله..

وجيه العرب متواريه والملك مذهول..

يدوّر لـ امل في مجتمع ما اجتمع شمله..

تناموا على غفلة رثاء منخر ابو الهول..

الين احسبوا بالهول يرثى على عَمله..

عن الناس وقبور الضحايا من المسؤول..

رجالٍ صحاح اجساد وعقولها ثمله..

مواكب تحف بواحدٍ ضايعٍ مخذول..

قلوب الاوادم من عمايله محتمله..

وجعنا من اول حول فينا وحال الحول..

مهو من نهار اليوم لو مادرى كم له..

سلاح الرجال مولّم وزندها مفتول..

تحزّم ولا تدري لمن هو تحزّم له..

يقولون حرب ولا سمعنا لقرع طبول..

وعشنا زمان الذل من قلة الصمله..

وش يقول من يمشي على سكته معدول..

ويلقى اقرب الاقراب بالغدر لغم له..

رمينا الحجر في بركة شربها معسول..

ومن كثر ما ينبت حوالينها غمله..

عسانا نحرك شي فالواقع المقتول..

ولحدٍ يقول الروس ما هي بمكتمله..

سليمان بن داوود ما قال انا مرسول..

توقّف بجيش الله من كلمة النمله..!!

- أحمد بن سارح