قلبي وش اخباره معك , مرتاح , واخبارك معه
من يوم اخذته ما تلاقينا وهو ما عاد جان
يا خوفي انك شفت بابي والنوافذ مشرعة
وظنيت طير احساسي مصوّب وبرقعت الحنان
سكبت سايل غيبتك فوق التلال الموجعة
ونبت بها زهر عجز يشرب شفاه البيلسان
مشيت لا برق سبق ظله وحن لموقعة
ولا غمد سيف دب فيه الخوف واستشرف سنان
ما جيتك اهمس بالحقيقة جيت اهز الاشرعة
ان كان باقي للهوى المغدور واللفة مكان
تدارك احساسك حبيبي , اصغ للحس اسمعه
من قبل تذبل زهرته بيدك وينساك الزمان
- إبراهيم السمحان