الموضوعات الأكثر
يا حلو العمر الى من الليالي سولفت برضاك
بعد عمري وش ايامي الى ضاعت من ايامك
حبيبي ينتثر غيم المعاني من سما طرياك
على طول المسافه والوله يرقص على انغامك
تغازلك الدروب اللي تمنّى لو تحضن خطاك
وتشربك العيون اللي غدت تصحاك وتنامك
تصوّر والبحر لو هو معاني .. ما وصل معناك
حروف الكون تغرق في مدى حضوتك وزحامك
نشد عنك الخيال اقصى مداه ولا وصل لادناك
ولا ادري تلبس وسام الحلا أو يلبس وسامك
حبيبي و الربيع اللي خذا منك الحلا و اعطاك
نثر ورده على خدّك وفاح الكون بخزامك
وسيف البرق لا سل المنايا وارتعش بشفاك
يذوب الغيم حول الجمرتين وتسكر انسامك
وليلك لاتغطرس وانتثر شلالّه وغطّاك
تفز الشمس بثياب الضحى وتغيب بلثامك
يامجنون الحلا ماحلاك يامحلاك يا محلاك
تدلّل وش تبي ما دام قلبي يطعن حسامك
ياحلم ايام عمري والرجاوي كلها رجواك
انا احلامي مداها للسحاب تخاوي احلامك
تسافر لو تسافر باول دروب الحنين القاك
أشك انّك على دقّات قلبي تنصب خيامك
تعال .. الشوق في دنياي يشرب من وله دنياك
ومن طاريك يختال الحكي ويهيم بهيامك
معي سولف وهات من السواليف اولك واتلاك
انا اسولف معك في غيبتك وشلون قدّامك
حبيبي يابعد ذولا وبعد ذولا وبعد ذولاك
ترى ايامي وحياتي ياحياتي كلها ايامك
- الشاعر/ خالد الجبر