الموضوعات الأكثر
يالعبد وإن ضاقت من الناس دنياك
ازبن على من صوَّر الكون كلّه
ازبن على مولاك خلاَّق الافلاك
اللِّي يظل من التجا به بظلّه
اللَّي من الصلصال يالعبد سوّاك
شيءٍ عملته خالقك حافظٍ له
اللي يدير أركان ملكه بليّاك
رب القضا ما بالقطا فاطنٍ له
إن راد لك خيرٍ على الخير مشّاك
محصي جميع الخلق دقه وجلّه
هو الذي ينجيك من كود بلواك
اللي عقل يوسف على غاليٍ له
يالعبد في دنياك يالعبد بانهاك
خذ ما خطر بالبال يا سامعٍ له
جارك إلى منّه بغى طول لاماك
احذر رخيص الهرج لا تستملّه
ورفيقك اللي ما شيٍ درب ممشاك
اليا انعقد حبله على الكود حلّه
وراع الجمايل خل دونه حميّاك
لا تتركه واجعل بقلبك محلّه
لا تتركه بالكود لعداه وعداك
خفّف عناه ودونه السيف سلّه
إن جاك باده ضحكةٍ من محيّاك
واظهر لمكنون المودّة رضاً له
واترك رفيقٍ كلما غبت يشناك
ويخطي عليك بزلةٍ عقب زلّه
خلّه يتيه وخالق الكون يرعاك
وسلكٍ يعقدك فيه لازم تسلّه
ابعد عن اللّي ما يودّك ويهواك
انزح ديارك عن ديار المذلّه
وإن جاك مغرورٍ على العمر يبلاك
عميق ضرباتك تراها دواً له
رم المعزّه لو تجي بين الأدراك
وعف الحياه اللِّي وراها مذلّه
موتك بعزٍ يرفعك عند مولاك
ولا الحياة اللِّي وراها مذلّه
واذكر ترى من يكتب السو يبراك
وراع الحساني كاتبه مردفٍ له
يحصون ما سويت يا لعبد بهواك
والكل منهم بالقلم مصغيٍ له
دايم على الكتفين الأيمن ويسراك
وكلٍ معه للّي فعلته سجلّه
واحذرك لا تظهر سراير خفاياك
لعداك واحذر لا يجي فيك خلّه
من لا يورّد بالشدايد ضماياك
خلّه عسى وبل الحيا ما يعلّه
وراع النمايم بعّده عن دناياك
لازم توريه الجفا والمملّه
الناس عوجان المناطق تبلاك
الحاقدين أهل القلوب المغلّه
ربك اليا منّه على الزين مشّاك
حطّوا بدربك هضبةٍ مستقلّه
لولاي أعالج جرح قلبي بتنباك
وبنٍ يجوز لشاربه وسط دلّه
لا فرفرة موحش بيدين شباك
زود عليه ومحكم السير تله
من شوفتي ناسٍ على الشَرك تحداك
الشرك وسط بيوتها تحتفل له
بالعين شفت اليوم ذولا وذولاك
للشين عدّو كل عيطا مطلّه
يا مرشد البذّال ما والله انساك
الا أن يزول طويق عن ماقعٍ له
دايم وهاجوسي من البعد ينصاك
صداقةٍ بالقلب يمّك تدلّه
تمكّنت ماناشها كل دكّاك
يوم الوفا في ساحتك مدهلٍ له
اقسمت لك بالله يا رشد ما غلاك
محبةٍ لبست من البيض حلّه
عسى الردي يا بوسعد من فداياك
من تاه يا مرشد عن الطيب خلّه
اليا انعقد قلبك ترى دواه ودواك
بعدك عن اللِّي ما يودّك عزاً له
يعتن فكري كل ما أوحيت طرياك
يوم الوفا عدّيت في مرقبٍ له
عسى المنايا يالرشيدي تعدّاك
ويضفي عليك مدبر الكون ظلّه
- الشاعر/ الأمير محمد بن أحمد السديري -رحمه الله-