مرحوم يا أمير الوفاء والجمالات
مرحوم يا راع الكفوف النديّه
أونس على صدري جبال السراوات
ومن فوقهن اونست هضبة (طميّه)
وشلون ما ارثي معزّبي واكتب أبيات
وأنا معبه سبعين عامٍ خويّه
عمري قضيته في ذرا طيّب الذات
من يوم ماكنّا بنجد العذيّه
ضاقت علي فجوج الأرض الوسيعات
وهاضت هواجيسي سريّه.. سريّه
صارت عزومي يا بوفيصل ضعيفات
من بعد ما كانت عزومي قويّه
وابوي قبلي بالليال الصعيبات
لازم معه حتى خذته المنيّه
عم الحزن كل الحناجر والأصوات
يبكونه رجال الوفاء والحميّه
وتبكي عليه جبال نجد المنيفات
وام رضمه، والمسعري، واليديّه
قال المثل من عقّب الحي مامات
عسى العوض في راس زبن الونيّه
مشعل زبون الطايله والمهمات
يا قل بين الناس تلقى حليّه
المستشار اللِّي جميع القيادات
حطّت ثقتها في حميد السجيّه
سلطان ثم نايف وسلمان هامات
هامات نجد أهل اليدين الصخيّه
الشاعر/ جارد بن سعد الجارد العنزي - وكيل إمارة رفحاء سابقاً