يا سعود موتك كل قلبٍ يروعه
علمك ظهر بالتلفزه والإذاعه
كلٍ تمنَّى يوم سمعت سموعه
إن الخبر هذا مجرَّد إشاعه
كل الوطن عليه هلَّت دموعه
يالله عساه يفوز بأكبر شفاعه
ما ودنا يرحل وتطفئ شموعه
مرحوم ياللِّي غاب عنا شعاعه
نرضى بحكم الرب حنَّا بطوعه
يا رب ترحم من خذيته وداعه
مؤمن ونفسه دوم ما هي جزوعه
صابر على ما جاه لله طاعه
عقل وثقل والنفس فعلاً قنوعه
كلك رضا يا سعود كلّك قناعه
سعود فيصل راح يا قل نوعه
سبب لعدوان الوطن كم راعه
سامي سما بالعز حزَّة طلوعه
من يوم ذاع الصيت وأبحر شراعه
هو سَـيِّد السادات ما اقوى ضلوعه
حرٍ تَعلَّى فوق فوق ارتفاعه
كل المزايا الطيِّبة من طبوعه
نادر مثيله عبقره مع شجاعه
نفسه ما تقبل ذل ما هي دنوعه
الفيصلي شرواه ياطول باعه
عزِّي لمن قلبه فراقك يلوعه
ما غاب عنه الحزن لو ربع ساعه
- الشاعر/ عبدالله جامع المطيري