لا تازن الرجال لا شفت زوله

وزن الرجال اعقولها يا فتى الجود

دلايل الرجال فعله وقوله

تحكم عليه بمنطقه علم موكود

ما ينفع الرجّال جسمه وطوله

لا صار ما يدري عن النقص والزود

كسب المعالي ما يجي بالسهوله

يصعب على اللي ما يجامل على الكود

المجد عشاق الكسل ما ينوله

دربه على اللي يجهل الطيب مسدود

وحفظ الشرف مبدا صفات الرجوله

والمتزن ما هو على درب منقود

ومرافق الجهال يا بن الحموله

نقصٍ على السمعة وتعقيد وعقود

كلٍ جليسه يقتدي في فعوله

المعتدل واللي عن الخير مصدود

ومع الأسف بعض العقول معزوله

ما تقل بالدنيا لهم رب معبود

ما خافوا المولى وطاعوا رسوله

اللي له العبّاد خشّاع وسجود

ما حسبوا يومٍ حسابه وهوله

يشيب رأس اللي هكاليوم مولود

يطرق منافيذ الخوافق ذهوله

يوم الحساب اللي به العبد موعود

بأخر نفس لا نوخت به ذلوله

يوم التفاهم بين ناشد ومنشود

عند الضريح آخر محطة نزوله

النفس تصعد والجسد مرتع الدود

يأهل العقول المبصرات احسبوله

ترى الحياة بلا عمل ما بها فود

أعمل عمل وأطلب من الله قبوله

منهج طريق الخير واضح ومحمود

دامك نشيط وكل شيء تنوله

ترى السفر له حد والعمر محدود

- الشاعر: بدر الحويفي