مرثية في النقيب الشهيد ناصر بن خالد بن شليويح العطاوي -رحمه الله-

هذا ولد خالد وجده شليويح

زودٍ على طيب العقيده عقاده

هذا الذي يشفي صدور المجاريح

اليا جعل بين اصبعينه زناده

امضى من البتَّار وأجود من الريح

ومنه الدريك إن جاه يدرك مراده

قريّب الفزعة بعيد المشاويح

ودايم على الرب الكريم اعتماده

اليا لفى له شر ساهم بتصحيح

واليا لقى له خير بالخير زاده

ولمغلّفات الحل عنده مفاتيح

بالعرف كنّه واحد من العواده

ومن دون داره والوجيه المفاليح

مهنّدٍ روس الجبابر حصاده

يجرّي اللي قدمه يقوم ويطيح

ويشاف في أجساد الأعادي سداده

واللّي حصل برهان من دون تصريح

جمّل بني عمه وجمّل بلاده

اقبل مثل ما يقبلون الزحازيح

والخاتمه نصرٍ مبين وشهاده

الفعل بذره والأوادم فلاليح

ونار المكارم ما تعقّب رماده

- الشاعر: نايف معلا