الموضوعات الأكثر
اليا انتحى الهاجوس جريت صوتي
واليا انتبهت اثري بشهر رمضاني
شهر الفضايل به تطيب الوقوتي
بتلاوة القرآن نعمة وأماني
من فضل رب البيت محصى الشتوتي
والحق مثل النور مابه مثاني
دايم كلام الحق يسوى السكوتي
توه يترجم عن ضميري لساني
ابجتهد واحرص واتوّج بيوتي
بالنصح والإرشاد يضمن ضماني
السوق به مشلح وبالسوق كوتي
ياغافل اسمع كلمتي بالأذاني
راع السفر ياخذ شرابٍ وقوتي
مير الله الله با اكتساب الحساني
فرصة ثمينة وانتبه لا تفوتي
قبل الندم قبل فوات الأواني
كد قيل لا تتعب وتحفى السبوتي
كمٍ خايعٍ يضحك به القحوياني
أصبح هشيمٍ واحرقته الوقوتي
واقفت مع العشرين عشر وثماني
وكم منزلٍ عشش به العنكبوتي
من عقب ماهو مدهل أهل المعاني
ماكنهم داجو بوسط البيوتي
الدايم الله والله المستعاني
هذا الكلام اللي عليه الثبوتي
رحلة عمر تمضي سوات الثواني
يالله لعل اقلوبنا ما تموتي
وعسى منازلنا فسيح الجناني
- صالح بن عبدالرحمن الناصر