يا رب تهديني وترزقني دروب المهتدين

أطلبك درب الاستقامة والزيادة في الأجر

أنت المجيب أنت الحكيم أنت الموفق والمعين

أنت القدير تفجَر الأنهار من صمَ الحجر

خوف ورجا في الأرض تسجد لك جباه الخاشعين

يا حظ صدر اللي بتوفيقك وتسبيحك تجر

يا حي يا قيوم يا علام ما تخف السنين

الحظ فضلٍ منك ما هو بالمحايل والزجر

ما يستهمّ من الزمان إلا صدور العاقلين

اللي يعرفون السنين تشابه أوراق الشجر

يا صاحب القلب النصوح النصح طبع المصلحين

كلٍ له أعماله رصيد اللي صدق واللي فجر

صل الفروض الخمس وأركع لك لو إنه ركعتين

في غفلة السالي قبل لايذن آذان الفجر

رتل من الآيات واقرأ في رياض الصالحين

هذي تراها خير من دنيا التفاخر والهجر

وإن كان ما أنته لا كريم ولا حكيم ولا عوين

يعني بدون مجاملة لا أنته زناد ولا نجر

من واقعي صغت الدرر ماجات من شوق وحنين

لو إن شوقي مثل كسر العظم يسجرني سجر

واسلم ويسلم من عطاك العلم يالقلب الفطين

المعرفة والطيب ما فيها صكوك ولا حجر

يا للي تشوفون الحقايق شوف وأنتم ساكتين

يا معمرين المدن والأبراج من بعد الهجر

أكبر دليل من العقل والمعرفة متشبعين

صدوركم لو ما تحسب حساب يمكن تنفجر

هذي حقيقه والحظيظ اللي كسب دنيا ودين

يالله توفقنا وترزقنا الهداية والأجر

- راشد فاروع