الغلا الصادق تشوفه واضح بليا دليل

أبيضٍ كالغيم لونه راسيٍ مثل الجبال

ياشعاع الشمس مابه شي تحتك مستحيل

غير نسيان الموده والتلاقي والوصال

ياملاك الروح وديّ تكسب بقلبي جميل

دامك اول من سكن به وباقيٍ ولا تزال

لا تخلّي للعواذل يا هوى بالي سبيل

وثّـق دليّ المحبه بالمتين من الحبال

الكلام اللي حكيته كنّه السيف الصقيل

والله انّه عكس وصفك وانت آيه بالجمال

لوطعوني من رماح عداي ترديني قتيل

يمكن اهون من عيونٍ تطعن بليا قتال

من عرفتك تعرف أني ماارتضي غيرك بديل

ماسلب روحي وعقلي غيركم يابن الحلال

ياعديل الروح تكفى كل طاري للرحيل

عن خيالك سق ركابه خلّها تطوي الرحال

أدري انك شخص نادر وادري امثالك قليل

وتدري ان الشوق فيني ماهو بحاجة سؤال

أنت عندي ملتجى الوجدان والظل الظليل

وعشقكم طوّق خفوقي من يمين ومن شمال

ليه تبعد وانت تدري يم غيرك ما نميل

كل نبضه من خفوقي تزهمك تكفى تعال

العمر ضايع بدونك ياعسى عمرك طويل

كل ليله في غيابك كنّها عدة ليال

- الشاعر/ صالح محمد العنزي