الموضوعات الأكثر
يالله عسا دينك بسلمان منصور
سلمان بن عبد العزيز أخو نوره
ليثٍ غيور وغيرته جالها طور
في ساعةٍ منها الصدور امحشوره
يوم الخميس الفجر مع شعّة النور
سته شهر سته مناصف شهوره
بثّت قنوات الفضا في فضا الدور
علم ولد سلمان مقدم سبوره
في عاصفة حزمٍ محنّك وممرور
معاد يسمع في قراره مشوره
عَمّد وتعميده اينفّذ على الفور
وحامت على جو اليمن من شروره
أسراب سودٍ كل سودا بمأمور
وفي بطنها عوق الخصيم وثبوره
أسراب سودٍ مثل نوٍ على القور
موآخره تدفع مقادم انحوره
وهلّت على الحوثي من النار شختور
صواعقه تذوب منها صخوره
ردعٍ لنازيته على الجار بالجور
وفوالته قدّام يفطر فطوره
حميّةٍ للدين والجار مأجور
من شرذمة فارس وزورق بحوره
لاهنت يا سلمان بن متعب الكور
عودٍ لعب في ماضي الوقت دوره
رسمتلك لوحة شرف كلها نور
يبي يخلّدها الزمن في عصوره
لمعانق الإسلام كابر ومكبور
ما دامت الدنيا والأرض امعموره
وحنّا حزامك في نحا كل مطيور
اضرب بكفٍ من حديد وغيوره
انجدّد الطاعه وميثاق مقبور
وصيّته قدّام يسكن قبوره
في صفّنا من خالف الدين مدحور
لوهو ولد نستاصله من جذوره
الأمن داخل والحما خارج السور
خطٍ حمر ورقا بنا للخطوره
يفرض تضامنّا ولا هوب معذور
من يستبيح الحارمه بالضروره
في سورة الكبرى وفي سورة الشور
ندين للطاعة وحكم المشوره
ما نعتدي وليا اعتدى ضايع الشور
خليجنا غالي ودونه اصقوره
خليجنا من دونه شبور وشبور
ما كل من هازه تطوله شبوره
وقصيرنا ما يلحقه ضيم وقصور
في ظلّنا مستامنن في قصوره
علّم عميل الملحدين ابو دنقور
وخله يشوف الوضع صوتٍ وصوره
ون كان ماكفّاه ماجاه من جور
يجي ويلقا في يمنّا دبوره
الشاعر - غلاب الثبيتي