يا هاجسي وردّني العدّ القراح من العدود

مدام تغريك المفاخر دوب هبّت نودها

إن كان طاولت السحاب وهبّ لك للعز نود

سحايب التاريخ جتك بروقها ورعودها

سولف وأسولف لك عن التاريخ وأمجاد الجدود

عن وحدة المجد العتيق اللّي بنته عضودها

شمس البيارق والجبال السمْر وعروق النفود

تشهد على مجد السعوديه ونصر سعودها

قم قهوني دام الوطن غنّا وحنّا له جنود

قنّدني بريح البنادق لا اعتزا بارودها

قم خيّل العوجا ترانا كلبونا بن سعود

حنّا مقابيس الحروب وعزّها وجنودها

لبيّك يا الحد الجنوبي يوم جينا فالوعود

بواسلٍ من شان تطهيرك تشب زنودها

أبشرنا لاشِبّت النيران يارمز الصمود

إليا طْمَعتْ فيك العدِا قمنا بشقرةْ عودها

شف عاصفة حزم الملك سلمان في صنعاء تذود

ذلة عيال الفرس منها قبل ذل زيودها

إحدود ديرتنا مهو عقم ٍ على جه الحدود

حدودنا دم الوجيه اللي بوجه حدودها

وأرواحنا تجلب على سوق المنايا واللحود

مادام دون أطهر بلد يامرحبا بلحودها

شهيدنا يفوح دمّه ريح مسك وريح عود

ويخلّد اسمه في سجلّ المملكه وفهودها