طلايع المجد لاحت لي بيارقها

تحت لوا خادم البيتين معقودة

متوكّل برب هالدنيا وخالقها

اللي بدونه يضيع العبد مجهوده

يوم اليمن تنتخي والظلم يورّقها

قال ابشري بالسعد والعزّ وفهوده

جيراننا مايعيش اللي يضايقها

والله لاخلي عدوّك يلزم حدوده

الحزم له ساعةٍ تعصف دقايقها

ومن لايجي باحترامه نكسر عضوده

صدّر قراره وكلّف من يطوّقها

وأرسل لها قايدٍ من خيرة جنوده

أرسل محمّد ولد سلمان يعتقها

من شرّ حوثيّها وأفعال نمروده

لولاه كفواً لها ماقال حققها

محنّكٍ خابرٍ منشاه وجدوده

أجياله اللي معه بسنين سابقها

ماهو من الجيل هذا غير بـ وجوده

أعطى الأوامر صقور الجوّ وأطلقها

وهدت على معقل اللي خان بعهوده

الحوثي اللي عثى بالأرض وأحرقها

والطائفيّه وخبث الأنفس وقوده

أوامر الفُرس بالملّي يطبّقها

عمايم الرافضة تآمره وتقوده

أقبل عليهم سطر وخطاه يسبقها

متوشحٍ سيفه ومجند وباروده

ودّه يحرر من الحوثي مناطقها

ويصفّي الطالح الكذاب بوعوده

وتعوّد أرض اليمن من كفّ سارقها

وشعب اليمن بالتهاني ينثر وروده

يالله يامعطي العالم ورازقها

تكتب له النصر يارحمن وتزوده

يالله بأمرك جيوش العزّ وفّقها

جميع الآمال بك يارب معقودة

متعب النصار الشراري - محافظة القريات