الموضوعات الأكثر
دقت طبول العاصفه بأمر سلمان
واذعن لها العالم بغربه وشامه
أنا اشهد أنه للحرايب كحيلان
إذا ضرب تفتك بالاعدا سهامه
منه العدو ما نام بالليل سهران
وان نام شافه وارتعب في منامه
له وقفة منها يروغن الاذهان
ومنها العدو يطمع بدرب السلامه
وله هيبة منها العدو دوم حيران
في طلته او مشيته او كلامه
العاصفة هاجت على جبال دخان
وقامت على العدوان حرب الكرامه
بالجو دخان وبالأرض نيران
والحوثي اصبح تايه في حطامه
وصعده بها صارت على جال بركان
وفيها العدو اصبح سواة النعامه
وما عاد للحوثي مقر وميدان
اما يموت او يعلن الانهزامه
يالحوثي انته بالحسابات غلطان
ما انته كفو سلمان تاقف امامه
إذا غضب سلمان تهتز الاكوان
وتقوم يالحوثي عليك القيامه
وياسيدي سلمان ياذرب الايمان
الشعب شعبك ياوريث الشهامه
والحزم حزمك وانت للحزم عنوان
والمجد مجدك وانت ذروة سنامه
آمر نقول ابشر بنا طول الازمان
لو خضت فينا البحر خضنا التطامه
خل العدو يموت ضيم وحقران
حيثه رضع ثدي الردى واللئامه
خل العدو اللي نكث كل الايمان
يموت بالميدان ميتة ندامه
وافتك بمن عقله رقص فيه شيطان
واغرس سيوف الحق في كل هامه
معك محمد ابن سلمان لابان
شبل الأسد يا حي ذيك السمامه
نعم الوزير اللي رفع للبلد شان
حيثه على العدوان جرد حسامه
وله بالشجاعه قلب وكف ولسان
والا بجوده مثل وبل الغمامه
لاثارت الهيجا حسمها بليهان
ياقو بطشه ثم ما اقسى انتقامه
وتعيش يااغلى وطن بين الاوطان
وبزود حبك ماعلينا ملامه
لجلك وطن تاريخ وامن وايمان
ولجلك وطن على الثريا مقامه
نفديك بالغالي من اموال وابدان
حيث إن لك على الجميع الزعامه
واذا زهم نجران او صاح جيزان
لبى الشمال وضجت ارض اليمامه
ويعيش مقرن حيث به طيب واحسان
هذا ولي العهد قدر وقامه
ويعيش ابن نايف وهو طير حوران
اللي جمع حنكة وصيت وفهامه
في حبهم مانسمع لكل فتان
ولا نستمع لاهل الهوى والنمامه
آل السعود اسياد قاده وشجعان
اهل الوفا والجود والاستقامه
وعدوهم مدحور خايب وخسران
يموت ما يحقق بيوم مرامه
وهبت رياح النصر في كل ميدان
وعدونا يشوف يوم اصطلامه