القاف وسط الصدر مل احتباسه

والوضع يفرق عن جميع المواضيع

واليوم يا شعّار لون الحماسة

من فيكم اللي يامر القاف ويطيع

اليوم ما هو وقت شعر الوناسة

وما هو بوقتٍ للهدد والمطاليع

اليوم يوم أهل القنا والسياسة

يومٍ به جنود الوطن ذبّوا الرّيع

يالعنبو شعرٍ ينكّس براسه

لا جات حزّات اللقاء والزعازيع

والعمر لو ما قد رضينا مساسه

من دون حد المملكة جعله يضيع

الأرض مثل العرض تبغى حراسة

وتبغى رجال ترهن العمر ويضيع

يالجندي المجهول وين الفراسة

ما عاد بك مجهول وفعولك تذيع

من ينطح البارود لعيون ناسه

وجب على ناسه تحيّه وتشجيع

يسطّر التاريخ فعله وباسه

ويدوّن اسمه في كبار المشاريع

واليوم ما به غير شعر الحماسة

إلين تصفي في الجنوب الينابيع

- الشاعر/ سعد بن بتال بن دليم السبيعي