قالها سلمان وجموع العداء مدحوره

كلمةٍ لكبودنا مثل الزلال الصافي

خيّل العوجاء وأنا سلمان وأخو نوره

خيّل الأجرب ليا منّه تراجع هافي

الخصم والله لأشوته مثل شوت الكوره

بين حجّانه وفي قلبه وبالأطرافي

والمواطن نحسبه للوقفه المذخوره

وكل شعب المملكة وقت النوايب وافي

والمعارك حاميه بالصوت هو والصوره

والجبان يغيب يوم إن الشجاع يشافي

من تخلّف عن مثل هاليوم مثل العوره

وش يميّز صامل الوقفه سوى الميقافي

العداء من حولنا وأهدافها مسعوره

واليمن ما هو هدف معروفه الأهدافي

وش بقى قامت تحاصرنا كلاب الثوره

زمرةٍ ما تعرف الميثاق والأعرافي

كل من سافر لطهران وخذاله دوره

جاء يطبّقها خبيث الساس والأوصافي

وأشكر الله وأحمده بالرايه المنشوره

لا إله إلاّ الله اللي ما خفاه الخافي

الله أكبر رددوها والعداء مدحوره

لين يخضع من يعادينا ويصفى الصافي

- الشاعر/ دحيم النومسي