الكيف يا اللي توزن الكم والكيف

أجهز على نار الكرامه وسوّه

مده ليمنى ما تهاب التكاليف

اليوم ما ينفعك ليته وتوّه

اليوم يوم الحزم جاله عواصيف

يا ما حلا لبس الرجال المموّه

لا من سِما من شرّف المجد تشريف

يعجبك في يوم الكرامه سموّه

شعب (ن) يعز الجار ويكرّم الضيف

لا كبرت القالات يطحن عدوّه

حنا الولاء والجود والظل والريف

وحنا الفخر والعز.. برقه ونوّه

افعالنا أوضح من البرق لا شيف

واقوالنا قول الخطيب المفوّه

شعب (ن) على الهقوات مثل الغطاريف

لا من دعاه الموت يمشي بجوّه

نبرد كبود اللي نخونا ملاهيف

حنا عمى عين العدو المتوّه

وحنا هل التوحيد من غير توصيف

دون الوطن.. بحره.. وبره.. وجوّه

وافين وخشوم الأعادي مناكيف

له الولاء سلمان عزم (ن) وقوّه

وحب الوطن ما هوب كذبه وتزييف

من ماضي الأيام ما هوب توّه

نثبت ولو تثقل علينا الصواديف

ونثني ركبنا للوفاء والمروّه

- شعر/ ساري