عندك كلام وفي عيونك مشاريه

على نحيلٍ ذاهبٍ ذاهبٍ ذيهبانه

وجلٍ صويب مسلوعاتٍ لياليه

يقطف مزاهير الندم في بنانه

عيّت تضحّكه السنين وتبكِّيه

إلاَّ على حسب الثقة والميانه

إما إنه أصلف من زمانٍ غدر فنيه

وإلاَّ إنّه أوفى من ليالي زمانه

يا موردٍ صدري مهالك مضاميه

ومجرّدٍ صبري ثواني طمانه

تنشد عيوني عنك واقول شوفيه

بين اجتماع الشوف به وغديانه

حلمٍ يراودني من التيه للتيه

فَجّ الضلوع وقال: هذا مكانه

وليا تمنّى قحويانه بختريه

ميّل بختريّه على قحويانه

وليا درج سرج الحكي بين آشافيه

ابراي للّه من تبجّح ثمانه

ما شفت قلبي؟ ما وصفوا لك حراويه؟

يا كيف ضيّعته وهو معك أمانه

- الشاعر: مساعد الرشيدي