يا رازق اللي ما ضرا بالشحايد

لو حس من حاسوس الايام باعسار

حنا عرب ولنا سلوم وعوايد

ما نستهين بصاحب الحق لا صار

بعزومنا نصبر على كل كايد

من خوف كلمة مسردٍ كلب عقّار

رادي بخت ما هو على الناس زايد

الا بترويج النمايم والاسرار

والمرجله عن مستواها يحايد

لا جات لزمات الرجاجيل ينهار

كريم حزات الرخاء بالوعايد

وبالواجبه ما له على الجود مقدار

عساه يفدى ناطحين الشدايد

نطاحت الواجب بعيدين الاذكار

لو انهم من نازحين البدايد

اخير واطيب من قريبك ليا بار

لا صار بالشدات ما به فوايد

مثل النقيعه قيمته بين الاشجار

لو كان وصفه طير ما هوب صايد

تقصر فعوله عن طويلين الاشبار

لا وخسارة لابسات القلايد

عند العفون اللي عن الطيب قصار

لا صار ما هم بالشدايد سنايد

وجودهم لا هوب نافع ولا ضار

ورجّال ما حاش الثناء والحمايد

لا صاحبٍ فاقد غيابه ولا جار

ما يفقد الا طيبين العقايد

اللي لهم بالطيب مارد ومصدار

اللي ليا كلت وجوه الخرايد

افعالهم تثبت لهم مجد واخبار

لا زارهم من نازح الدار رايد

بوجوههم شاف البشاشه والانوار

لا هابوا الجزله وجوه الردايد

عليهم الجزله كبر ضلع سنجار

زبونها الطيّب وسيع البنايد

اللي بعزمه يحتمل كل مخسار

اللي ليا جات العلوم الوكايد

جوده يشاف ليا انكشف زيف الاعذار

- الشاعر/ بدر الحويفي