لي صاحبٍ يوم اختلي باللي في عينه من نعاس

كني غريرٍ شايفٍ له حاجةٍ ماطالها

قام يتعَلق فالهوى بيديه واغراه الحماس

لين انتبه له راعي الحاجة وقام وشالها

ليِن ورمشه مفتري وش مفتري.. شديد باس

لا اجتاحني ما يترك ولا خفقةٍ ما اغتالها

وان قلت يا ثمل الهدب لا تفتري فعيال ناس

قال الهدب والناس لا تغامر معي بعيالها

وإن قلت يكفي سلهمة قال بغنج على اي اساس

كنه ما يدري عن مهاديبه وسرُف افعالها

وان غاب وغصون المحاني خم مورقها اليباس

طَول عليها لين تذبل من جفاه وجالها

ما هوب يرويها بماي الوصل مدقوق اللعاس

ولا هوب يتركها تموت من العطش في حالها

مرة يجيب الغيم ويصبه عليها كاس /كاس

ومرة يخليها.. يذوقني من الجفوة ومن خلخالها

يا هو تدلل فالمحاني بين هجر وبين ياس

وابطى علي لين حذفتني فرحتي من بالها

واقبل على يسعد مسا غصنه وعوده يوم ماس

يوم انطرق والله ما خلى ميلةٍ مامالها

وذكرني نعاسٍ فعينه يسعد الله هالنعاس

اللي لاجا بيقول له كلمة عجز ما قالها

- بجاد البقمي