قصدت الوفا يا طاري قمت لك وارحبت

ضيوف الطواري قدرها قدر غايبها

تفضل وقل لي من طويل البطاوش جبت

مانا بقايلٍ لك خطوتك ويش جايبها

يشفّعك عندي ماضي العرف لو جنبت

لحا الله رجلٍ رفقته ما يوجّبها

أنا أدري بك من اشملت عني وعنك اجنبت

تحسب الليالي حسبة اللي يحسبها

وظعاين هوجسك ما شغلها غدير ونبت

وزمانين وأنت تحث لاجلي ركايبها

الين انتبهت انك بها من وفاك اذنبت

توثّمت فيها كثر ما انته معذبها

ولا هو كثير لغاليٍ طاب فيك ان طبت

ولكنّ هقواته بعيدة مطالبها

على كل حال ان كاني اخطيت والا صبت

ترى قسوتي من قسوة الوقت كاسبها

إذا كان خبرك بي ليامن قصدت اطربت

مناهل ورودي ما صفت صفو شاربها

تماديت بحضوري وانا غيبتي لا غبت

يموت العتب متندمٍ من سبايبها

عزاي اني اليا تبت عن طيب خاطر.. تبت

ما هي توبةٍ يستثقل التوب صاحبها

- بداح ماشع العبلان