الموضوعات الأكثر
أنا اشهد ان الحزن ما فيه.. ماويه
حتى عصي الدموع اهتزت اضلاعه
الشعب سطر بدمع العين مرثيه
صارت ضلوعه حطب والحزن ولاعه
موتة حكيم العرب ماهي بعاديه
نجم هوي من سمانا بعد مطلاعه
شفنا التعازي بالابراج الكويتيه
وشعب الامارات وسم الحزن بذراعه
الامر للي تفرد بالالوهيه
والنفس ماهي من الاقدار جزاعه
الموت مكتوب والاجال مقضيه
مصيرنا للفنا وارواحنا وداعه
سلام ياسابع ملوك السعوديه
يصافحك.. يا ملكنا باطيب انواعه
نرفع لك التهنيه والشكر برقيه
ونبايعك بالولاء والسمع والطاعه
بيعة شريعة.. على الاخلاص مبنيه
قلوبنا من القصيم تجيك فزاعه
ولولاة عهدك بصدق العهد ممليه
نجدد العهد معهم وابرك الساعه
فيك الثقه يا ملكنا صادق النيه
في ظل حكمك.. وطنا يرفرف شراعه
شوفك كما الغيث للارض السناويه
وصوتك يسر الحزين ويطرب اسماعه
ابوك راع الفتوحات البطوليه
سيرتك من سيرته واطباعك اطباعه
ومقرن عساها ما تطفي ناره الحيه
بالصدق والتضحيه ما ينلحق باعه
مع الكرم والسياسه فيه حنيه
يدرك هموم الوطن ويعالج اوضاعه
والامن درعه محمد مقدم الهيه
دون الوطن يحتزم برجال وصناعه
عنده على الخصم ضربات استباقيه
ومن سطوته زمرة الارهاب مرتاعه
دارك.. تعانق للاجرام السماويه
وقلوب شعبك لحب الدار نزاعه
نشكرك.. يا سابع ملوك السعوديه
ونبايعك بالولاء والسمع والطاعه
- رشيد الفريدي